Kári Steinn Karlsson var rétt í þessu að ljúka Berlínarmaraþoninu á glæsilegu Íslandsmeti, 2 klst. 17:12 mín. Þessi tími tryggir honum jafnframt keppnisrétt á ólympíuleikunum í London á næsta ári. Kári Steinn kom 17. í mark og 6. í sínum aldursflokki. Við óskum Kára Steini og þjálfara hans Gunnari Páli innilega til hamingju með þennan frábæra árangur.
Fyrstur í mark í hlaupinu á nýju heimsmeti var Patrik Makua frá Kenýa en hann rann skeiðið á 2:03:38 klst., sem er bæting á gamla metinu um 21 sekúndu.
Hlaupið hjá Kára Steini var nokkuð jafnt, en milltímar hans voru sem hér segir:
- 5 km 16:08 mín.
- 10 km 32:20
- 15 km 48:25
- 20 km 1:04:28 klst.
- 25 km 1:20:31
- 30 km 1:26:43
- 25 km 1:53:03
- 40 km 2:10:02
Fyrri hluta hlaupsins fór hann á 1:07:58 klst., en þann síðari á 1:09:15 klst., en eins og fram hefur komið í fréttum, fékk hann smá krampa síðari hluta hlaupsins. Meðalhraði Kára Steins var um 18,45 km á klst. og að jafnaði fór hann hvern km á 3:15 mín.
Makau, sem sigraði einnig í Berlín í fyrra, bætti met Eþíópíumannsins Haile Gebrselassie, sem hann setti í Berlín 2008, um 20 sekúndur. Gebrselassie var meðal þátttakenda í hlaupinu nú en átti við meiðsli að stríða og lauk ekki hlaupinu. Florence Kiplagat frá Kenýa sigraði í kvennaflokki á tímanum 2:19:44. Irina Mikitenko frá Þýskalandi varð önnur á 2:22:18 og Paula Radcliffe frá Bretlandi þriðja á 2:23:46. Er þetta fyrsta hlaupið í tvö ár, sem Radcliffe tekur þátt í en hún hefur átt við meiðsli að stríða.
Senda á Facebook
Senda á Twitter
Smartmedia Vefsíðugerð og vefhönnun © 2012