Ingi Rúnar Kristinsson úr Breiðablik bætti met Bjarka Gíslasonar í stangarstökki, er hann stökk 4,69 m, á Meistaramóti Íslands 15-22 ára sem fram fór á Akureyrarvelli um helgina. Met Bjarka var 4,68 m. Dagbjört Ingvarsdóttir 15 ára stúlka úr HSÞ vann eitt besta afrek mótsins en hún sigraði í langstökki í sínum aldursflokki með 5,27 m, en í aðeins of miklum meðvindi (2,1m/sek). Hilmar Örn Jónsson úr ÍR sigraði sleggjukastið í sínum aldurflokki með fáheyrðum yfirburðum, en hann kastaði 63,58 m, en hann á best 64,13 m í þessum flokki í ár. Egill Níelsson úr Hrafnaflóka sigraði í hástökki 18-19 ára flokkum með árangur upp á 1,91 m, á sínu fyrsta meistaramóti.

ÍR sigraði stigakeppni á Meistaramóti 15-22 með yfirburðum, en liðið hlaut 759 stig, en næsta lið á eftir voru heimamenn í Ungmennafélagi Akureyrar með 347,5 stig. ÍR sigraði stigakeppnina í sex af átta keppnisflokkum, en UFA í tveimur.

 

Alls voru 177 keppendur skráðir til leiks fá 19 samböndum og félögum og kepptu þeir samtals í 144 greinum á mótinu, en fjöldi skráninga (afreka) var 818. ÍR var samtals með 52 keppendur skráða til leiks, en UFA næstflesta eða 21.

 

Úrslit mótsins er að finna áMótaforritinu á heimasíðu FRÍ.