Ljóst er að barist verður um hvert stig og það er alls ekki er auðvelt að ráða í einstök úrslit í 46. Bikarkeppni FRÍ sem fram fer á Kópavogsvelli um helgina út frá fyrirliggjandi úrslitum. Bæði er að mikið er af nýju fólki sem stígur fram að þessu sinni og fær aukna ábyrgð. Svo eru nokkur forföll meðal reyndari keppnismanna. Einnig er mikil spenna undir niðri og ákafi og álag keppenda misjafnt.

 

Á pappírunum og miðað við stöðu á afrekaskrá ættu ÍR ingar að verja titil sinn í kvennaflokki og FH-ingar að sama skapi verja sinn titil í karlaflokki. Hins vegar má lítið út af bregða hjá þessum liðum til að titillinn í sameiginlegri keppni renni þeim úr greipum.

Sameiginlegt lið Norðlendinga, HSK, Breiðabliks og lið Ármanns/Fjölnis eru nokkuð svipuð að getu í heildina litið. Styrkur þeirra er þó mismunandi. Kvennalið Norðurlands ætti að vera nokkuð öflugt og verður í baráttunni um efstu sætin, en karlaliðið er veikara en ella, m.a. vegna forfalla Þorsteins Ingvarssonar. Að sama skapi er kvennalið HSK nokkuð öflugra á pappírunum, en gloppur eru nokkrar í karlaliðinu hjá þeim. Karla- og kvennalið Breiðabliks og Ármanns/Fjölnis eru nokkuð jöfn að getu miðað við önnur lið.

 

Venju samkvæmt verður ekkert gefið eftir og barist verður um hvern sentimetra og sekúndubrot og því verður bæði skemmtileg og spennandi keppni að ræða og þó tölfræðin gefi vísbendingar, skiptir hún litlu máli þegar komið er á keppnisvöllinn og sjaldan ganga spár eftir um öll úrslit.

 

Tímaseðil og keppnendaskrá má sjá hér.