Ásdís Hjálmsdóttir þeytti spjótinu 59,12 m á Ármannsmótinu 2. ágúst sl.í Laugardal í Reykjavík. Með þessum árangri náði hún lágmarksárangri inn á Heimsmeistaramótið í frjálsíþróttum sem fram fer í Daegu í Kóreu og hefst í lok þessa mánaðar. Kastsería hennar var nokkuð góð, því hún átti rúmlega 55 m kast og annað 58 m kast. Þetta sýnir góðan stöðugleika í hjá Ásdísi sem er gott veganesti fyrir Demantamótið í London um helgina.

Þessi árangur Ásdísar dugar einnig sem lágmark á Ólympíuleikana á næsta ári, en allur árangur frá 1. maí á þessu ári til 8. júlí 2012 er gjaldgengur sem slíkur.

 

Næst keppir Ásdís á Demantamóti IAAF sem fram fer í London á föstudag og laugardag. Hægt er að sjá frekari upplýsingar um mótið á heimasíðu Demantamótanna.