Lið FH bar yfirburðasigur úr býtum í stigakeppni félaga á Meistaramóti Íslands 11-14 ára sem fram fór í Vík í Mýrdal um helgina. Hlutu FH-ingar samtals 658,3 stig eða um 190 stigum meira en lið HSK/Selfoss sem var í öðru sæti í heildarstigakeppninni.  Breiðablik varð í þriðja sæti en lið ÍR í því 4., en þeir höfðu sigrað þessa keppni undanfarin ár.

 

Keppnin fór fram á Víkurvelli, eins og áður sagði, en talsverðar endurbætur voru gerðar á vellinum eftir skemmdir sem m.a. urðu á honum vegna gosösku sem á hann féll á síðasta ári.

 

FH sigruðu einnig í flokkum pilta og stúlkna 11 ára og yngri, 14 ára stúlkum og 13 pilta. Breiðablik sigraði í flokkum 12 ára pilta, 13 ára stúlkna og 14 ára pilta. Sveit HSK/Umf. Selfoss sigraði síðan örugglega í flokki 12 ára stúlkna.

 

Alls mættu 203 keppendur til leiks frá 17 félögum og samböndum. Úrslit mótsins er hægt að sjá mótaforriti FRÍ hér: http://mot.fri.is/cgi-bin/ibmot/timesedillib1632.htm

 

Góður árangur náðist í mörgum greinum, þrátt fyrir að veður setti strik í reikninginn síðari dag mótsins, en þá gekk á með roki og úrkomu.