MÍ Aðalhluti fer fram í frjálsíþróttahöllinni Laugardal um helgina. Alls eru um 170 keppendur skráðir til leiks, frá 13 félögum, og má búast við harðri keppni í flestum greinum. Besta frjálsíþróttafólk landsins mun etja kappi á mótinu og mæta margir verðlaunahafar síðustu innanhúss móta. Ásdís Hjálmsdóttir og Helga Margrét Þorsteinsdóttir úr Ármanni munu berjast um sigur í kúluvarpi kvenna, en Helga Margrét vann einvígið á RIG leikunum 16. janúar og Ásdís landaði sigri á Stórmóti ÍR 23. janúar. Í Kúluvarpi karla keppa meðal annars, félagarnir úr FH, Óðinn Björn Þorsteinsson og Bergur Ingi Pétursson. Þetta er fyrsta stórmótið sem þeir taka þátt í á árinu. Þorsteinn Ingvarsson HSÞ og Kristinn Torfason FH mætast í langstökkinu, en báðir hafa stokkið vel yfir 7m á árinu.

 

Margir efnilegir keppendur eru skráðir til leiks og má þar helst nefna Stefaníu Valdimarsdóttur úr Breiðabliki, en hún gerði sér lítið fyrir og vann sex gullverðlaun á MÍ 15-22 ára um síðustu helgi. Hún á vafalaust eftir að láta til sín taka á brautinn, þar sem hún keppir meðal annars við Hafdísi Sigurðardóttur HSÞ og Stefaníu Hákonardóttur úr Fjölni í 400m hlaupi. Örn Davíðsson úr FH mun keppa í kúluvarpi karla, þar sem hann mun veita félögum sínum Óðni og Bergi harða keppni.

  

Frjálsíþróttadeild Ármanns sér um framkvæmd mótsins í ár, í samstarfi við FRÍ.