Alls hefur framkvæmdastjórn ÍSÍ samþykkt að úthluta um 60 milljónum króna fyrir þetta ár, þar af 45 milljónum úr Afrekssjóði, 10 milljónum úr sjóði ungra og efnilegra og 5 milljónum frá sjóði Ólympíufjölskyldunnar. Eins og síðustu ár þá tókst ekki að koma til móts við nema hluta af þeim styrkjum sem óskað var eftir af hálfu sérsambanda ÍSÍ. A-landslið karla í handknattleik fær hæsta styrkinn að þessu sinni vegna undirbúnings og þátttöku í lokakeppni EM sem nú stendur yfir í Austurríki, alls 10 milljónir króna. Þá fær Knattspyrnusamband Íslands fjórar milljónir króna í styrk vegna A-landsliðs kvenna. FRÍ hlýtur rúma 1milljón króna vegna landsliðverkefna, en það er tæplega helmingi lægri fjárhæð og frá árinu 2009.

Ásdís Hjálmsdóttir, Íslandsmethafi í spjótkasti úr Ármanni, er eini íþróttamaðurinn sem verður á A-styrk Afrekssjóðs Íþrótta- og Ólympíusambands Íslands (ÍSÍ) en styrkurinn er 1.920.000 á ári. Sjö íþróttamenn hljóta B-styrk og sjö aðrir C-styrk.

 

B-styrk Afrekssjóðs, sem er helmingur af A-styrk, hljóta: Ásgeir Sigurgeirsson, skotíþróttamaður, Bergur Ingi Pétursson, frjálsíþróttamaður, Björgvin Björgvinsson, skíðamaður, Helga Margrét Þorsteinsdóttir, frjálsíþróttakona, Jakob Jóhann Sveinsson, sundmaður, Ragnheiður Ragnarsdóttir, sundkona og Þormóður Árni Jónsson, júdómaður.