Framfarir, hollvinafélag millivegalengda- og langhlaupara, afhenti á dögunum viðurkenningar til bestu hlaupara og hlaupahóps ársins 2011. Viðurkenningarnar voru veittar á Reykjavík International Games í Laugardalshöll, segir í fréttatilkynningu frá Framförum.

 

Karlhlaupari ársins var Kári Steinn Karlsson Breiðabliki fyrir árangur sinn í maraþonhlaupi en hann setti nýtt glæsilegt Íslandsmet í Berlínarmaraþoninu, 2:17,12 klst og náði um leið lágmarki á Ólympíuleikana í London fyrstur íslenskra karla. Einnig setti Kári Steinn Íslandsmet í hálfu maraþoni 65.35 mín. Helen Ólafsdóttir ÍR var kvenhlaupari ársins, viðurkenninguna hlítur hún fyrir góðan árangur í heilu maraþoni á árinu 3:00,43 klst sem er besti árstíminn og fimmti besti árangur íslenskrar konu frá upphafi. Aníta Hinriksdóttir ÍR var efnilegust kvenna auk þess sem hún fékk viðurkenningu fyrir mestu framfarirnar. Aníta átti frábært ár, bætti árangur sinn í öllum greinum og sér í lagi í 800 m úr 2:18,1 mín í 2:08,64 mín og í 1500 m úr 4:44,83 mín í 4:28,59 mín. Bætti sig í öllum öðrum greinum einnig. Hún varð auk þess Norðurlandameistari í flokki 19 ára og yngri en Aníta er nýorðin 16 ára og var því 15 ára þegar hún vann titilinn.